[www.ozodlik.org]
[www.ozodlik.org]









 
Чоршанба 17 Апрель 2002


[ news header ]
[ архив ]


Москвада ёш неофашистлар ташкилоти аъзолари бир афғон фуқаросини ўлдиришган. У шаҳар кўчаларидан бирида қаттиқ калтакланганидан сўнг касалхонада ҳаётдан кўз юмди. Афғонистоннинг Москвадаги элчихонаси Россия Ташқи ишлар вазирлигига махсус нота билан мурожаат қилиб, мазкур фалокат юзасидан ташвишланиш билдирган. Сўнгги кунлар мобайнида Москвада хорижий фуқароларга қарши бундай тажоввузларнинг кучайгани айтилмоқда. Одатда неофашист ташкилот фаоллари апрел ойида Адольф Гитлер туғилган куни арафасида анашундай қотилликларга қўл урадилар. Москвада хавфсизлик чоралари кучайтирилган.
Афғонистонда бир америка аскари яраланган. Маълумотларга кўра Қандаҳор шаҳрида кетаётган машинадан унга қарата ўқ узилган. Пентагон матбуот мулозимининг радиомизга маълум қилишича жангчининг жисмоний аҳволи қониқарли даражада. Сўнгги пайтларда Афғонистоннинг Шохи Кот водийсида яна ал-каида жангарилари пайдо бўлгани айтилмоқда. Шу хафтанинг бошларида мазкур худудларида ракета снаряди портлагани оқибатида тўрт америка харбийси халок бўлган эди.
Эроннинг Машҳад шаҳрида 16 фоҳишани ўлдирганликда айбланиб олий жазога тортилган Саед Ханай қатл этилди. Эроннинг ИРНА ахборот агентлига тарқатган хабарга кўра Ханай кеча Машҳад қамоқхонасида жабрланувчиларнинг оила – аъзолари кўз ўнгида осилган. Гарчи Эронда фоҳишалик 1979 йилги Ислом инқилобидан сўнг таъқиқланган бўлсада, сўнгги пайтларда у қайтадан илдиз отмоқда. Мамлакатда ишсизлик ва иқтисодий қийинчиликлар авж олар экан, айрим қатламлар учун фоҳишалик пул топишнинг бирдан-бир манбаи бўлиб қолмоқда.
Ҳиндистон ғарбидаги Гужарат штатида диний қарама-қаршиликлар давом этмоқда. Мамлакат полициясининг хабар беришича Аҳмадободда маҳаллий ҳиндулар ва мусуслмонлар ўртасида юзага келган келишмовчиликлар натижасида камида уч киши қурбон бўлган, юзлаб киши оғир жароҳат олган. Бугун Гужарат штати маҳаллий кенгаши фавқулодда мажлисга тўпланиб, минтақадаги вазиятни мухокама этган. Маҳаллий расмийларнинг маълумотларига кўра Гужаратда феврал ойидан буён давом этаётган диний қарама-қаршиликлар давомида жами 800 киши қурбон бўлган, уларнинг аксарияти мусулмонлар. Бироқ, у ерда фаолият олиб бораётган ноҳукумат ташкилотлари тарқатган маълумотларда қурбонлар сони 2000дан кўп бўлиши мумкинлиги айтилади.
Исломобод расмийлари Ҳиндистонни Покистон дипломатини хибсга олиб, уни қийноқларга солганликда айблади. Покистон Ташқи ишлар вазирлиги чиқарган баёнотда айтилишича дипломат Али Аббас Дехлида Ҳиндистон махсус ҳизмати ходимлари томонидан олиб қочилган ва қамоқхонада қийноқларга солинган. Расмий Исломобод Ҳиндистоннинг бундай ҳаракатини провакация сифатида баҳолади. Сўнгги ойлар мобайнида Ҳиндистон ва Покистон ўртасидаги муносабатлар жар ёқасига келиб қолган. Ҳар икки давлат чегараларида қўшинлар юқори даражадаги шай холатга келтириб қўйилган. Ҳиндистон Покистонни Қашмирда фаолият олиб бораётган эктремист гуруҳларни қўллаб-қувватлаганликда айбламоқда.
Югославия ҳукумати харбий жиноятларда гумон этилаётган шахслар келаси уч кун мобайнида кўнгилли равишда Хага халқаро трибуналига таслим бўлишларини сўради. Бунинг эвазига Белград уларга адвокат ёнлашлари учун шароит яратиб беришни ваъда қилмоқда. Агар гумон этилаётган шахслар талаб этилаётган муддат ичида таслим бўлишмаса, улар Югославия парламенти томонидан қабул қилган Хага трибунали билан ҳамкорлик тўғрисидаги қонунга мувофиқ хибсга олинишлари мумкин. Уруш жиноятларида гумон этилаётган шахслар рўйхатига 10 нафар Югославия фуқароси ва 13 босниялик сербларнинг номлари киритилган. Улар орасида Радован Каражич ҳамда Ратко Младичлар ҳам бор.
Кўп йиллардан буён мухожиратда яшаб келаётган Афғонистоннинг собиқ қироли Зоҳир шохнинг бугун кечқурун Қобулга келиши кутилмоқда. Собиқ монархнинг мамлакатга келиши олдидан пойтахт Қобулда хавфсизлик чоралари кучайтирилган. Зоҳир шоҳ ўзининг 8 оила аъзоси ва 12 маслаҳатчиси билан бирга Римдан Афғонистон вақтли идораси раҳбари Ҳомид Қарзай ҳамроҳлигида келади. Кеча Карзай Римга ташриф буюрган эди. 1973 йилда тахтдан ағдарилган Зоҳир шоҳ Римда жами 29 йил яшади. Собиқ қирол ва унинг оиласини Қобулда афғон харбий ҳизматчиларидан ташқари, 50 нафар Италия полициячиси ҳам қўриқлайди. Улар Афғонистонга Италия Бош вазири Сильвио Берлускони фармоиши билан уч ой муддатга юборилган. Қобулдаги халқаро тинчликни сақловчи кучлар матбуот мулозими Майор Жан Ўз радиомизга берган интервьюсида сўнги пайтларда пойтахтда хавфсизлик билан боғлиқ вазият анча яҳшиланганини айтади. Бироқ Жан Ўзга кўра халқаро тинчликни сақловчи кучлар Зоҳир Шоҳ хавфсизлигини таъминлаш борасида ҳеч қандай мажбурият олмаган. "Авваламбор унинг ҳавсизлиги учун Афғонистон вақтли идораси жавобгар. Халқаро тинчликни сақловчи кучларнинг роли ҳардоимгидай Қобул кўчаларини қўриқлаш, шунингдек сарой атрофларида хавфсизликни таъминлашдан иборат" - дейди Майор Жан Ўз. Зоҳир шох июн ойида чақириладиган Афғонистон оқсоқоллар кенгаши Лоя жирга илк мажлисини очиб беради. Лоя Жирга Афғонистоннинг янги хукуматини сайлаши керак.
Яқин Шарқда тинчлик ўрнатилиши аввалам бор томонларнинг бу борадаги интилишларига, улар олган мажбуриятларнинг бажарилишига боғлиқ. Бу ҳақда АҚШ Давлат котиби Колин Пауэл бугун Қуддусда ўзининг етти кунлик тинчлик миссияси якуни бўйича қилган чиқишида баён қилди. Бугун Пауэл Рамаллоҳда Фаластин етакчиси Ясир Арафат билан иккинчи давра сўзлашувларни олиб борди. Деярли икки соат давом этган музокаралар сўнгида чиқиш қилган Пауэл Арафатни террорчиликка қарши кескин чоралар кўришга чақирганини айтди. "Арафат билан учрашувлар давомида мен унга фаластин маъмурияти ҳамда унинг раиси иккиюзламачилик сиёсатини тўхтатиб, террорга барҳам бериш борасида конкрет чоралар кўриши зарурлигини уқтирдим", - дея баён қилди Колин Пауэл, ўз сўзида давом этиб. "Исроил ҳусусида гапирадиган бўлсам дейди АҚШ давлат котиби, Исроил босқинчилик сиёсатини тўхтатиб, зудлик билан ўз қўшинларини фаластин худудларидан чиқариши керак". Колин Пауэлнинг таъкидлашича Бош вазир Шарон билан бу борада келишувга эришилган. Ариэль Шарон, гўёки Исроил қўшинларини фаластин ҳудудларидан келаси ўн кун давомида чиқаришга ваъда берган. Фаластин раҳбари Ясир Арафат ўз чиқишида гарчи айрим фаластин ҳудудларидан Исроил қўшинлари чиқарилган бўлсада, бу билан вазият ўзгаргани йўқ. "Улар, яъни исроилликлар фаластин халқига қарши босқинни давом эттирмоқда. Улар Президент Буш даъватларига, қатор Европа давлатлари раҳбарлари чақириқларига қарши чиқмоқда. АҚШ ва бошқа ғарб давлатларии Рамалоҳда исроил харбийлари жорий этган қамални бекор қилиш борасида амалий ҳаракатлар қилиши керак" - деди Арафат. Бир неча дақиқа олдин, Пауэл Миср раҳбари Хосни Маборак билан учрашиш мақсадида Қуддусдан Қоҳирага учиб келди. Шунингдек бошқа араб давлатлари ташқи ишлар вазирларининг ҳам Миср пойтахтига келиши кутилмоқда.
  [RFE/RL Logo]
[Navigation]
[www.ozodlik.org]
  Radio Free Europe/Radio Liberty (RFE/RL) is an independent,
international news and broadcast organization whose
programs--radio, Internet and television--reach influential
audiences in 21 countries such as Russia, Iran, Iraq,
Afghanistan and the republics of Central Asia. RFE/RL is
funded by the U.S. Congress.

Radio Free Europe / Radio Liberty
© 2008 RFE/RL, Inc.
All Rights Reserved.
contact us: webmaster@rferl.org
reports rubrics audio archive contact go-up homepage email print